طريقة تشويط راس الحولي بالصور خطوة خطوة

من طرف موقع نسوة:

طريقة تشويط راس الحولي
طريقة تشواط الراس

 كنستعملو البوطة وممكن نستعملوا المجمر نديرو فيه العواد من الأحسن

نحيدو ليه داك السوالف الزايدة 

وكنبدا نشوطو وفي نفس الوقت نخدمو بالموس نكرطو

وكنبقا هكدا نشوطو و ندورو في الراس ونحكو بالموس باش مايتحرق الشعر مزيان 

هاهو منين تشوط

من بعد كنرقدوه في الماء ، يعني يكون غارق نيت المهم منين كنرقدو كنخليوه يبات ليلة إلا درتو في العشية وإلا في الصباح كنرقدو في الماء وكنغسلو في الليل ، كنحكوه نيت بالبونجا ديال الماعن وشوية التيد

  مكاتبقاش فيه نهائياً لا ريحة لا والو حيت  

من بعد منين كنجبدوه من الماء باش نغسلوه تيكون مبلل أكيد وإلا كانو شي شعرات فكيسعابش علينا نحيدوهم  غير بالماكينة د الحسانة

من بعد كنركزو الموس على النصف ديال الراس

 وكنزلو عليه بالعود واحد الخبطة مزيانة ، و كنبقو بهاد الطريقة حتى نكملو ونقسموه على جوج 

المهم من بعد كنخرجو المخ وكنزيدو نقسموه من مكان الفك يعني تيولي الراس مقسوم على 4 كاين لي كيقسمو على جوج 

من بعد كنسلقو في الماء غي شوية وشوية الملح ، تطلع غي الغلية واحد 5 الدقايق ونحيدوه

من بعد ما نكونو صفياه ، كنزيدو عليه البصلة بزاف والتومة والربيع والملح والكمون بالزايد والبزار والخرقوم والتحميرة والسكين جبير

 وكنسدو عليه فالكوكوت ونخليوه يطيب على رحتوا ويطيب مزيان 

وأكيد نرويوه بالماء

 من بعد فاش تنحلو الكوكوت كنزيدو الزبيب والحمص ، الحمص درتو مع الزبيب حيت كان عندنا غي المعلب أما إلا كان ديال الدار ديروه مع الراس يطيب

 المهم كنرجعو نخلوه يطيب مازال باش يشربوا نكهة الراس وتختار المرقة شوية 

وهذا الشكل النهائي للراس