فطائر بالحشوة رائعة ولذيذة بالصور

موقع نسوة يقدم

فطائر بالحشوة رائعة ولذيذة

من الاخت امة الله

مقادير فطائر بالحشوة رائعة ولذيذة

الحشوة الاولى بالكفتة
كفتة البقر (ولكن حتى ديال الديك الرومي كتجي زوينة شحال من مرة عملتها بيه كتعطي نفس النتيجة)
البصلة مشلظة على حساب الكمية اللي عندك ديال الكفتة
ملح
ابزار
سكنجبير
خرقوم بلدي
قرفة بزيادة شوية
شوية السنيدة
الزيت البلدية والى بغيتي تزيدي شوية من زيت المائدة
شوية الكوزة
طريقة تحضير فطائر بالحشوة رائعة ولذيذة 

الحشوة الاولى بالكفتة
في مقلاة على نار نضف الزيت مع البصل والتوابل ونترك الكل يتشحر
ملي تدبال البصلة نضيف ليها الكفتة ونحركها حتى تتفتت وطيب
ملي تقرب طيب نضيف ليها شوية السنيدة ونحركها مدة دقيقة نزولها من فوق النار

مقادير فطائر بالحشوة رائعة ولذيذة

 الحشوة الثانية بالبصل و اللوز و البيض
2 بصلات متوسطين مشلضين
50 غ بودرة اللوز
2 بيضات
ملح
سكنجبير
قرفة
زيت الزيتون
رقائق اللوز للتزين

طريقة تحضير فطائر بالحشوة رائعة ولذيذة
  الحشوة الثانية بالبصل و اللوز و البيض
في نفس المقلاة نعمل البصل مع الملح والزيت ونخلي البصلة حتى تتشحر مزيااااااااان
ملي طيح البصل وتقرب الطيب نضيف السكنجبير والقرفة ونحرك شوية
ثم نضيف البيض ونحرك بالزربة
ملي نحرك البيض ويقرب يطيب نزولو من فوق النار ونضيف ليه اللوز بودرة
وهاهوما الحشوات وجدو

نخليهم على جنب حتى نعجن عجينة الرغايف العادية غير هو مايكون فيها لا خميرة ولا اي شيء من غير الملح دقيق الفورص ودقيق القمح وتعجن بالماء دافي الى كان الجو بارد والماء البارد الى كان الجو سخون
كنورق العجين بشوية الزيت والزبدة مزيان ونجيب قطاعة البيتزا ونحيد الجناب العوجين المهم نحصلو على مربع كبير بدورو نقطعوه الى مربعات صغيرة ونعمروها بحشوة البيض مع اللوز وهاكدا حتى نكملو

نفس الشيء مع السيكارات غير هو في بلاصت مانقطع العجين الى مربعات نقطعهم مستطيلات ونعمرهم بحشوة الكفتة

ملي نكمل ندهنهم بالبيض مطرب واللي عمرتهم باللوز والبيض نعمل فوقهم لوز ايفيلي

ندخلهم الفرن حتى يتحمرو وملي نخرجهم دوك اللي بالكفتة نزينهم بالسكر صقيل والقرفة 

وهاهما فطائر بالحشوة رائعة ولذيذة واجدين

 

بالصحة والراحة